бысть в Константине граде, в лето шесть тысящь четыредесять седмое. При царе Иустиниане Великом, в двадесять шестое лето царства его, иже царствова лет тридесять осмь, и месец седмь. Бяху же сшедшихся святых отец числом сто шестьдесят пять. Старейшины же бяху Собора, Еввтихий патриарх Константина града: Аполинарий Александрийский: Домн Антиохийский: Евтихий Иеросалимский: Дамиан Созополитский. Сей Святый Собор, сверши убо, иже в Халкидоне Святаго Собора, и правоверная и спасеная повеления его вся утверди: и яже на той Святый Собор возрастшыя ереси проклят. Такожде проклят и отверже, первообразно убо Оригена злоумнаго, и вся нечестивая его писания. Евагрия же и Дидима, древле бывшая, и изложеныя отнею главы, рекше списания, яко ученика Оригенова и единомысляща, и с еллинскими смешена повелении: ибо сим телесем, ими же ныне обложени есмы, безумне рекоша не воскреснути. И еще же к сему блядяху глаголюще, яко душы первейши суть телес, и прежде телес родишася. От еллинских начинающе повелений, прехождение душам от тела в тело учаху. Конец же мучению, и бесом паки в первый сан устроитися, и Христа подобна нам быти, и ничто же различно имети от нас глаголаху. Рай же оклеветающе, яко несть сотворен от Бога, не быти ему. И еще же к тому глаголаху, не в плоти создан бысть Адам. И ина другая тмами хульная списавше, обличени быша, и многи от Церкви губяще, яже списания яве и ясно проявляхуся: но от неких в тайне держима бяху, ниже до конца обличени бывше на Четвертом Соборе: аще и неции от святых отец сия отметаху. Ибо по прежде того Святаго Собора, бяху были три еретицы. Врази три проклятии. Егда же во многи люди таковая лукавая начашася разсевати учения, тогда сей Святый Собор Пятый собрася. Сихъже и единомысленники их, и хульная их списания прокляша, и еще же и мемпуестийскаго Феодора, Несториева богоборца учителя, и с хульными его списании, яко скверныя плевы извергоша, с сими же и сущыя со Анфимом, и Петра из оружия исторгнушы. И еже на благочестие поборника Кирилла феодоритова зле и зловерна бывшая списания, и еликоже на Святый иже во Ефесе Первый Собор, и направую нашю клеветал бе веру, Несториеви злочестивому помогая: сними же и послание еже бе писал Ива епископ Едесский, к Персину Марину, та вся искорениша, яко не токмо правым повелениям противна, но и всякакого нечестия сопричастна, и церковная известиша повеления. Прият же сей Святый Собор и Феодорита епископа Кира града, и Иву епископа Едесскаго, яко Четвертый Собор приемше и похваливше, и прокленше Несториа